Poezija i proza

[riba]

     Glavar dvorišća (puran)

Visoko zdigel glavu na gnoju
Rad bi na silu on precedaval
Važno špancira z leva na desno
Dvorišću bi celom naloge daval

Naduto perje struže po gnoju
Koga bi našel si za potrčka
Učinka slabog je njegva galama
Sak ti po svome nekaj tu prčka

Zgrunta počasu,nikaj od toga
Jer se s koruzom spraznila zdela
Se hitro pridruži drugoj živini
Naj posel glavara drugi si dela

[riba]

         Za vinoljupce       

Tu ne pomogne ni cukor ni sol
Ak bi od vina te vlovila bol
F krugu ti zvrti se hiža i dvor
Zazuji ti v glavi bumbarov zbor

Strasno zagrliš we-ce si školjku
Je pravo rešenje za tvoju  boljku
Dok ti želudec malo se zbuni
Æisto bez srama nutri to pljuni

Na postelju bubneš teški kaj slon
Ti ćini se nate bu opal plafon
Ak bi od žene i čula se kletva
To ti se fućka,si pijan kaj letva

Čuješ  tam dalko neko se dere
Ta larma ti vuha draži bez mere
Rado bi nekaj joj rekel o tomu
Al nisi već gazda jeziku svomu

Pa se prepustiš sudbini svojoj
Slabog je leka toj muki tvojoj
No si sejeno i dalje buš spil
Samo naj zvrti se ringišpil

[riba]

       Megla jesenska

Poprilićno prejdi noć ta dohaja
Pa rosa poškropi povenuti list
A mrzla si zemlja meglu podigne
Kaj da tud neko potegnul bi kist

I mesec ćez meglu tu se probija
Gustu da vu nju si klina zabiješ
Bolje tud nejdi,puta će neznaš
Ti more se zgodit da se razbiješ

Se z nikim ne zideš više po kmici
A cajti se zgube kak nemi i gluhi
Pa v noći toj punoj olovne megle
Do jutra ti kružiju same još duhi

[riba]

                Kokot

Prvi na gruntu opre on oći
Pesmu započne dok još je kmica
Bilo ko blizu naglo se zbudi
Kaj da bi vbola željezna ga špica

Jedva se sčaka danjega svetla
Z rožom črljenom dela se glavni
Kruži okolo po celomu dvoru
Bolje nek kakev general slavni

Točno je pera složil na mesto
Od sake pomalo cviknul je boju
Lepo ga videt kak blesne na suncu
Al šteta kaj stalno kopa po gnoju

More on biti velki i jaki
Nebude zbegel gazdovog noža
Vreme dok dojde da mladi ga zmeni
Juhu začinila njegva bu roža

[riba]

            Passat

Je bilo muke vozit se s cugom
Zagreb i curik ni to baš lako
Ko ne bi verval nek si poproba
Drndal se v cugu ne bu baš sako

Rado ti zide,mesta ne najdeš
Pa se na ganjku praf nastojiš
Istina bog je ni to preskupo
Pol Hrvacke zvoziš tu za sitniš

Bolje je autek kak got potreti
Makar ga ruži i grdo kadi
Još bolja stvar je jako će trese
Barem šofer ti tu ne zaspi

Al će kupuješ kakovo sredstvo
Meštra si zemi posel kaj zna
Moreš si kupit bilo kaj hoćeš
No Švapska ti roba,to je ajnc-a.(bila bar prije Kine )

[riba]

         Za zimu

Iskri se bela tišina po bregu
Veter donesel je severa znak
Sused,suseda zel za kolegu
Po friškomu snegu ostavljaju trak

Idu bez reći jeden za drugim
Od zime je ćuti drevo kak pukne
Grabe po bregu korakom dugim
Za stopit se saki v ruku si hukne

Nikog na putu nemreju najti
Tu i tam same preletel bi ftić
Kak su predugi ti zimski im cajti
Do kleti napravil bude se smić*

Sesti si s pravim pajdašom pri peći
Pri vinu posluhnut kak ognjec pucketa
Kaj more se lepše reći o tomu
Naj tak ostane do kraja sveta

smić* - staza uglađena prećestim korištenjem

[riba]

             Jeseni

Jeseni boja je staroga zlata
Tu saki zeleni pozlati se list
Ko more sliku takvu naslikat
Dok priroda v ruke zeme svoj kist

Prsi na njivi tikva se klasu
Hrastu pa v šumi štima se breza
Kam oko segne,il nisko,il gore
Prosipanih farbi je cela lepeza

A se to dok zima strese na kraju
Zemlja se najde tim zlatom pokrita
Sprepletene najdeš črlene i žute
Je točno kaj rubaća,starinska našita

[riba]

         Martin

Itak bu došel,zval ga il ne
I mošta bu tvoga rado pokrstil
Da već ne rećeš:-„ni to za spiti“
Z njim buš pajdaše do jutra častil

Po stezici vuskoj bude se pentral
Poiskal sa vrata pelnica i kleti
Se zasune zlehka on bu obišel
Vrat ti se njemu nemre zapreti

Muke si mućil,knjige sprećital
Kaj se ne metal,tak dugo postil
Martin bu došel,zimu donesel
Kapljicu vinsku on ti bu ćistil

Pa naj rastoći ta rajska se kaplja
Nek bili peharci široki,il vuski
Naj noć Martinjska ne prejde potiho
Već pri pajdaši,i vinu,i pećenoj guski

[riba]

             Blato

Po ljeti dok onak stihoga škropi
Rečeju ljudi da curi sam kruh
Al z jeseni zna ga predugo razvleći
I onda se gazi po blatu do vuh

Zatackano bude celo dvorišće
Kaj ga spregazi na paši mladina*
Tak ti spremešaju travu i blato
Da nigdar nej rekel:-to je ledina

Tud se posmekneš kakti na ledu
Vodu pod nogam čuješ kak žvajca*
Od blata ostane flek ti na turu
Pa ti se smeju da strelil si zajca

Ni lanc ne pomore,niti potkova
Brcaju konji,traktori grebu
Tuliko blato kaj dejšć je napravil
Mrzlo to sunce već fsušilo ne bu

Mladina* - Zagorci tak po domaćem nazivaju perad
®vajca* - eh,kak to objasnit?To je ono kad ugazite u friško blato i čuje se nekakav zvuk

[riba]

         I zimi je lepo           

Ne da se više stati pri brajdi
Jer ti se zima spravi pod kožu
Vugnut se treba bliže do ognja
I s toploga lukat zmržnjenu rožu

Ni lepšega videt belo je inje
Kak znade okitit to zeleno borje
A kupicu vina si greti na ruki
Dok f peći dogarja posušeno korje

Pa naj bude zima huda i jaka
Zapadneju snegi naj velki do riti
Bar zna se onda poslu je konec
Da nikam se više ni za žuriti

[riba]

        Ne prenaglite

A buju već jemput ti skipeli mošti
Pa čovek si z voljom jenoga spije
Jer novo dok vino jemput se košta
Ti odma si za to naj staro se zlije

Samo kaj nej se neko prenaglil
I ga prerano zahitil na drum
Dobro je znana ona domaća
Da staro to vino pije ti kum

Pred  njega se navek najbolše daje
Ak kum nekaj pije,to nije kaj got
Kak bi to bilo za čuti po selu
Da kumu se daval  piti je šrot

Kapljicu staru treba poštivat
Jer se za novu još treba moliti
Stare se drži,naj nova se zmiri
Već ti se ona stigla bu spiti

[riba]

       Kasna jesen

Zazorila jesen po celomu kraju
Zemlju optoćil već mraza je ris
Ogoljeno drevje se ziba na vetru
Kakti da ljeto bi zvalo na bis

Po listju kaj tu je prhnut začelo
Scurel je zadnji dozreti kostanj
Na sunce dok malo meglu probije
Vun kapu porine jesenski vrganj

Zamenilo mesto svetlo je z noći
I puno ve predi  den se stroši
Opustelo se je kam got  obrneš
Božićno sam jabuko još se drži

Al pravoga mira ipak tu nebu
Belo dok platno to ne pokrilo
Zamrle buju te žurbe i sile
Tekar bu onda se se zmirilo

[riba]

            Odhaja jesen

V debelom kaputu stojim pod strehom
Jer sunce već zdavna je zgubilo moć
Rosa se dulje se cedi po plehu
I se nas bolj rano posećuje noć

Pa stojim tak dalje prislonjen pri stupu
Oći sam vuper* na susedni breg
Vidim da listja se već je na kupu
I se se pripravlja za zimu i sneg

Spred noći se ljudi s poslom žuriju
Rad spomenka retko se koji zastavlja
Pred većer pa vrane po zraku kričiju
To grožnja je zimi kaj se pripravlja

Nemreš to zmenit nikak na silu
A zima bu bila il oštra,il blaga
Već vnuka će imaš zibat na krilu
I čakat naj suncu povrne se snaga

vuper* - uperil,usredotoćil,fiksiral...itd

[riba]

             
                  Mesećina

Kom se za inat tak mesec napuhne
Kmicu potuće,da iglu bi našel
Pa puta posvetli sakom stvorenju
Kaj ne bi ko nekam na krivo zašel

A će za oblak negdar se skrije
Teško na pamet se steza napiplje
Onda za silu su dobre i zvezde
Razmetane kaj da ko jih rasiplje

Samo kaj mesec drugaće svetli
Tak da tu čovek se čoveka splaši
Æe v kmici na koga naglo nabasaš
Strah ti se lasi pošteno naraši

Pred oći ti skaću črne spodobe
Kaj da bi neko ih nate forsiral
Sreća pa mesec spod megle se zvleće
On svetlom bu svojim te vrage rastiral

[riba]

            Dedek

Deletel je vihor,otpuhnul škrlak
Ve se po blatnom putu kotura
Mali se dećec prignul za njim
Ga dedeku vrnul,to je kultura

Ko zna a kak bi on ga i vlovil
Æe palica njega starog potpira
Jedva po ravnom nekak se giblje
Na dol ni ne vupa jer ga zatira

Srećen će mesto prigrabi pri peći
V življenju je svom nazimel se dosti
Pa priliku saku zgrabi ćim predi
Kak bi tu stare podgrijal si kosti

Pipu zakuri,dim da ga skrije
®ute mustaće z veseljem pogladi
V bradu zabrunda pesmu starinsku
Ga briga za babu kaj vuni se svadi

Lepo si z mirom hoće poživet
Još koje leto će Bog mu ga da
Ni ga već briga za hiže i njive
®ivel bu onak kak same on zna