Poezija i proza

[riba]

              Zima

Potekli ve buju si kalni potoki
Odnašali suho to listje i trčke
Potackale race so blatno dvorišće
Zakešnjele zima polovila hrčke

Zaglancaju dejžđi zaprašene krove
Razdraženi vetri zazibaju grme
Zafučkaju zrakom kaj da se svade
Koji donesel bu pahuljne prve

Bisere se dok te poljem rastepe
Dok snegom se jarke belim zašiba
Pod zvezdanim nebom se bu tak mirno
Kakti da niti se zemlja ne giba

[riba]

           Seljaki

Sak bu se zlagal koji bi rekel
Kak ti na selu život je laki
More to reći koji ni probal
Jer za seljaka rođen ni saki

Posel za poslom tu te naganja
Porihtati grunta,namirit živinu
Po kmici se zdigne,isto tak legne
Ni preveć cajta za lovit krivinu

Namesto đeza tu se posluša
Kak motike ruže i zvoniju kose
Kakva got muka,navek se zdignu
I sili i Bogu seljaki prkose

[riba]

                    Megla

Pa će i zemlja po dnevu se zgrije
Mam se rashladi ćim sunce se skrije
I sako stvorenje dok počivku legne
Skrita se kmicom po kraju rastegne

Ne zgine ti ona ob juternjoj vuri
Se mekne tek dnevu će suncem ju skuri
Æe vu njej kog išćeš,moraš ga zvati
Tak gustu z lopatom bi mogel metati

Kak zima pritišće,nje je se više
Jedino veter na fletno ju zbriše
Pa dok bi ju nosil,niti da pisne
I gore na nebo med oblak se stisne

[riba]

   eto,malo razonode...nije me dugo bilo            

            Po zimi

Okitila injem jesen se kesna
To pahulji prvoj  postelju slaže
Kak sunce za sobom toplinu pobere
Zmržnjeni mesec nad bregom se kaže

Stisnul pod strehom vrebec se mali
I bose si noge on perjem pokriva
Prešlo je ljeto kaj suncem ga žari
Ve zima se rihta pa megla ga skriva

Zakuje se ledom potočec baš saki
Rasklimano drevje na zimi škripuće
Raskalano mrazom kamenje pri putu
Je videt kak zbatom da ko ga rastuće

Sprestrašenog miša si sova naganja
On crtu povlaći kaj sveca da riše
Rad zajec se vrtu skrivečki prišulja
I capom na snegu se belom potpiše

[riba]

              Vino

Eh,vino,vino…
Da bi te bilo,trebaš težaka
I kak ti od nekog napraviš junaka
Od nekog pa onak pravog bedaka

Eh,vino,vino…
Nekomu jezik tak trdo zaveže
A nekom ga zato rado razveže
Pa onda mu pamet do neba doseže

Eh,vino,vino…
Rad tebe se mnogi jarkom prevraća
Nekom pa cela se hiža obraća
Ko preveć te spije, mukom to plaća

Eh,vino,vino…
Od zemlje i sunca kaplja si data
I ko bi si mislil da s trsa i blata
Natoći se kupica takvoga zlata

Eh,vino,vino…
Na zlo te,il dobro ono napelja
Zbog njega se dobi,il zgubi fotelja
Al će te nije,ni ni veselja

[riba]

        Gorica  po zimi

Od branja v gorici tak je tišina
Al zato je vino prava milina
Na miris i okus,taman kak treba
Zafaliti treba na daru tom z neba

So listje z nje veter vun ti raznosi
Joj zemlja je gola kak bogec kaj prosi
Pa golu dok zemlju krti tu ruju
Pri kleti pijanci se ziblju i bljuju

Je stara gorica od zime vuspana
Opustele šibe nisu njoj mana
Za trse sto letne kaj mrtvi zglediju
Došlo bu vreme da pak oživiju

[riba]

        Moderno selo

Nemreš se igrat seljaka bez škole
Ni isto a kopaš goricu,il njivu
Ili si pošel potrgati tikve
Ili pa štel bi orezati šljivu

Kakva je korist od motike fine
Z njom će bi tukel po velikoj grudi
A će pa kramp bi nosil po njivi
Buju ti bogme se smijali ljudi

I to su bistro prokužila deca
Lepo se drže ekrana i miša
A krampe,lopate,štihaće i kose
S tim se ne druže,ko ti to šiša

[riba]

             Na vuletja pragu     

Još  malo pa zbudil bu prvi se cvet
Kaj vuletja ranog znake donosi
Spod listja se suhog suncu pokaže
Njegve topline zericu prosi

Jeden do drugog brege zabele
Pa se rasiplju i žuti i plavi
Kakti da nekom su scurele farbe
Il da bi slikar slikal po travi

Sunca tog zraka leptira privabi
Sim pa tam leti kaj da se straši
Na svetlu se blesne,senca ga skrije
I ko mu ta krila tak fino napraši

Kak teškog kaputa da čovek se reši
Tak snega i leda se zemlja raskuje
Pa bolje z veseljem mam se obraća
I okolo sunca lakše putuje

[riba]

             Vincekovo

I ko je to Vinka z goricom povezal
A kaj će bi sneg bil,kak buš ju rezal
No dobro je ono o špeku i mesu
Pa kost posle hitiš za igačku pesu

I onaj del z vinom čist je kak treba
Pa ne se tu valjda nadajala beba
Za toga je sveca ekipa pri kleti
Se muži kaj vino im preveć ne šteti

Poneki put kakva i ženska zabludi
Denes ti  tomu se nišće ne čudi
Kajti je lepša da z društvom se smije
Nek doma da sama skrivećki ga pije

Ne zdigne se jedna tu kupica viška
Pokoše se mesa prefinog kriška
Si dobroga teka,ni nutkat,ni šopat
Neš jenoga vlovil dok treba se kopat

[riba]

             Prošnja

Prosil bi lepo…
Æe bil bi de neko kaj bi se javil
I ljudima brige z glave vun spravil

Prosil bi lepo…
Æe bi se neko mogel zavzeti
Da vreme nam zdravlje već ne remeti

Prosil bi lepo…
Æe preveć nas ne bi koštalo to
Da neko odnese nam bolest i zlo

Prosil bi lepo…
A niko tu dole će ne pomore
Da onda pomore onaj nam gore

[riba]

            Ivančica

Ivančicu videt je kak  se beli
Spod snega i leda joj drevje škripi
Za dneva se saki z nje naj požuri
Æe gore ostaneš te zima vuspi

Ni dragi se kamen tak ne blešći
Æim sunce te brege zjutra zbudi
I mesec se preveć tud ne mudi
Od straha da zvezde mu ne vlovi

Jer visoko ona pod nebom stoji
Kaj vrha od megle je videti ni
A severni veter dok njoj se grozi
Si Zagorje svoje kak f krilu tišći

[riba]

        Već jih ni treba

Prislonjen pri zidu trošne je šupe
Pozabljen z drvenim koritom i kolom
Gda preveć je škripal pod teretom teškim
Podmazali bi ga s kojkakovom smolom

Nišće se nanjeg nej već ni zmislil
Da slučajno nisem prešel tud snoćka
Sam dobro se zlecal,jer kaj se to čuje
A to ti se v njega nasadila kvočka

Al sam ti ne prhne,pajdaša još ima
S potrganim košem on se tu tišće
Od koristi ovaj za vremena bil je
Znal materi služit za nositi lišće

Ve pa bez veze jemljeju placa
I jeden i drugi tu nutri se duri
Jemput se neko bude rasrdil
Kaj jih raspili i z njimi potkuri

[riba]

                   Pahulje

Spod ledenog svetla  neonske lampe
Te pahulje bele kaj iskre goriju
Pa z vetrom kaj mete krove i pute
Kakti da valcer il tango vrtiju

Su prele i prele cele ga noći
Poplun od srebra kaj zemlju sad krasi
On večeri sake na svetlu se vužge
A jutro ga z novim dnevom pogasi

[riba]

                          
                Sneg

Preprećil je saku  i najužu stezu
Optoćeni potok po tihom klokoće
Od zime se šaran v mulja zapiknul
Još jedino cucek na lancu cvokoće

I ni si poćival vu toj samoći
Prelepu črlenu zasipal je rožu
Makar vuspana od mrzle beline
Još more ti trnom rasparati kožu

Ni suze tak čiste nije na dlanu
Bisera plavog je skinul nijansu
Al den se rastegnul,zemlja ga grize
I sunca vrelina ne daje mu  šansu

[riba]

                Vinofil…

Sad bu taj čovek tek u problemu
Mu tu ne pomore ni pokojni Tesla
Jer mesto da škare nosi po trsju
On bu se moral vloviti vesla

No to je već njemu poznato stanje
Kom neko bi drugi se prilićno zgrozil
Al ima to zato i prednosti svoje
Bu lepo od trsa do trsa se vozil

I komu bi kakove reći uputil
Jer takvi problemi njemu su ćesti
Pa dok si se skupa posloži na mesto
Ne najde već cajta za štrajkat po cesti