Poezija i proza

[riba]

         Stari zeke

Nekaj si sikak trebal pročitat
Pred nek si razno voće posadil
A ne da te vezda panika lovi
Ti malo je kesno kliker proradil

Za preveć si toga dosti zamudil
Pa listje bi moglo sfrkat se hudo
No,bu ti znović stiralo novo
Kaj ne buš to držal za nekakvo čudo

Na vuletje moraš škare si zeti
Paziti svrži kak buš potkresal
Ziti bi moglo,će travu bi kosil
Da hrgu na ćelu trdu buš česal

Al škare i kosa nisu ti dosti
I špricu bi moral nucat početi
Jer ak si dobro se ne napraviš
Neš bral po zimi,al bogme ni ljeti

Ipak nej brigu preveliku imet
Il da se bi morti preveć sikiral
Čez leto,dve se bu selo na mesto
Buš tate z voćnjaka saku noć tiral

[riba]

           I za posel,i ne

Hja,posel je posel,napravit se treba
A tebi se denes nekak muktaši
Oći obrneš gore spram neba
Dobro bi bilo da dejžđek popraši

Tebi bi došel kaj ceneru as
No kaj buju rekli tvoji mejaši
Za njih to nebu pravi baš čas
I črna ta megla preveč jih plaši

Ti lepo pod slivom hlada si našel
Pa pamet na paši ti se poteplje
Skoro ti smešni sused se vidi
Na grudju dok trdom znoja rasteplje

Bi sebi ga dozval jer ti se smili
Al buš se onda vraga zahodil
Jer vidiš kak žena na vuho mu pili
Kaj da bi zmaja strelom pogodil

Najbolji onda mir je pri hiži
Zakaj bi delal napeto stanje
Čoveka sakog su drukčiji križi
Isto kak sakog je drukčije znanje

[riba]

            Patriocka            

Muči,muči kričali bi navek
Čim sam imel nekaj svoga reći
Z rogatim ti ni se dobro bosti
Budi stiha,dojdeš bliže peći

Zapraf tak je,bolje će pogledaš
Najbolj ti se prvi sused smije
Za pravicu ti si glasa zdigal
A pri peći on se bolje grije

Pak na kraju debljeg kraja vlećeš
Potlem gruntaš na kaj se to zide
Drugi moru se od toga zmeknut
Ti pa nemreš,si naprej te vide

Te ko hoće morti kam porinut
Nit na pravom mestu imaš strica
Moreš krepat tu za prvim plotom
Koga briga će te zeme kmica

I z Unijom  bi grdo mogli ziti
Viš kak to je zelo velkog  maha
Na zdrave  buju fkanili nas oći
Kak i naši za šefljicu graha

[riba]

         Pesmica soncu

Sončece,sončece,zakaj se skriješ
I ko zna kome nad meglom griješ
Niti te videt,nit traga ti najti
A si baš moralo pod oblake zajti

Naj veter potpuhne i oblake stira
Puste naj tebi sončece mira
Kaj bi nas moglo živo ogreti
Bez tebe je nekak ni za živeti

[riba]

      I opet Psycho

Ne bi to bilo baš prvi put
Da Psychu na trsu list bude žut
Već smjesu je novu,jaku pripravil
Sve živo i mrtvo s tim bu potravil

I onda se tome bu najbolje čudil
Trgovca krivil,da s krivim ga nudil
A priznati neće da puna je kaca
Ostala šprica da malo se paca

Sad jadan se pita bude šta s toga
Ne bi to zlijal niti za Boga
Za deset bu dana obznanil ekipi
Da otrov je jaći ak malo prekipi

Ak bi ti slučajno malo poplavil
Znači  predugo si ga ostavil
Il ti potegnulo nekud je zraka
Još pasala nutra bi sumporna traka

Dok to otvoriš,moraš pripazit
Mogo od toga bi se zarazit
Bolje na otpad ti to spakiraj
Rađe s kamilicom se inhaliraj

[riba]

         Stara hiža

Nemreš ni znati ,ak videl to nisi
Kak da ti sliku denem pred oći
Stezicu vusku,slamnati krovek
Hišku drvenu kaj letam svedoći

Mala črviva,raspukana okna
De skrhane šajbe* čavli držiju
Pol hiže zavzela peć pa bi krušna
Na zapećku njenom se deca sušiju

Na hrđavom pantu vrata škripiju
Jer masti se treba za jesti fčiniti*
Æe se ne prigneš prek visokog praga
Frštuk* mam kapu z glave ti hiti

Na zmusanom zidu visi raspelo
Gipsani Jezuš z vencem od trnja
Sako družinče pod njim se pomoli
Pa mu zafali na beručki* zrnja

Dok svetlo trepeće,očenaš ftihne
Pred Jezušom sak se stiha prekriži
Z Danicom zvezdom svećku pogase
Naj senek zabludi po drvenoj hiži

šajbe* - stakla
fčiniti* - začiniti
frštuk* - okvir od vrata
beručki* - šaci

[riba]

           Pri kleti

Kak da profulam prijatelju klet
Æe ju napravil mam je pri putu
Čim me zagleda on mora otpret
Da spijemo skupa kapljicu žutu

Na brenku pri vrati kupicu denem
Kaj sunce je već ju rasušilo zdavna
Bi štel ga pozdravit,da dalje si krenem
Al već mi je nova natoćena ravna

Za kupicom kupica.,večerka odide
Pak nas polefko kmica dohaja
Vužgate lampe tam daleć se vide
Ko zna kak dalko mi smo do kraja

Se nedamo nikam dok zvon ne zazvoni
Počakamo naj se čistam zamraći
Na kraju se jeden k drugom prisloni
I vužgemo jenu čist po domaći

[riba]

              Tuča

Vugni se rajši dok ne ti kesno
Oblečeno nebo je v črnem kaputu
Pri strehi se stisni, makar je tesno
Buš lukal po zemlji tuču rasutu

Kaj da bi šudra hitil z lopatu
Isto tak ona zvoni po krovu
Štetu napravi sima poznatu
Ko zna bu stiral mladicu trs novu

Tuče ga tuče,nikak prestati
Dvorišće već belu je dobilo formu
V najgoremu cajtu nahrupila z neba
Kak da ju neko pušća na normu

Potukla je grdo trsja i njive
Dok to polukneš pri srcu te cuka
Ostale su samo mlade koprive
I letos zabadav bude sa muka

[riba]

             Kukuvača

No sunčecu toplom ona se grije
Tam se po grmlju rado obrača
Malo od dugog puta počiva
Sima nam znana kukuvača

Al Jurjevo ćim se tu razeleni
S čistoga mira ta se pojavi
Kak da ju neko pismom pozove
Il nekakvu vuru ima vu glavi

I onda popeva od ranoga jutra
Kuka,pa kuka kaj se odzvanja
Takvog muktaša teško se najde
Z gnezdima luckim da dela sranja

Tak to potraje vuletje celo
Sakom obznani;kak ona je tu
No nedelja gluha ćim ju zalovi
Nemreš već čuti ku-ku,ku-ku

[riba]

       Špricanje             

Primite dečki šprice si v ruke
Dejšć je odišel,sončece sveti
Treba pošpricat,zemlja ćim stegne
Jer bolest bi mogla se vam požeti

Ni se za igrat s takovim poslom
Æe bolest napadne bu velika sila
Neko bi rekel:- da tog mu je dosti!
Od zadnji krat šprica se ni posušila

Kak da je važno će je još mokra
Ak vraže te gljive stalno tišćiju
Na se to skupa još ve i dojdu
®uti i sivi kaj zrakom letiju

Dok prejdeš ćez trsje gore i dole
Do petog suseda „arome“ dišiju
Da prava je mera znadeš po tome
Nad trsjem ti ftići već ne letiju

[riba]

      Bolja vremena

Malo se naš je admin naljutil
Čudnu sam smesu neku zamutil
Nisam baš stavil se kaj se išće
Pa mi je voćka sfrkala lišće

Ne bum ja zato s foruma nestal
Niti nas on bu učiti prestal
Predi nek sveto pravilo legne
Po svome si saki rado potegne

Još ti bu z nama velike muke
Mi smo ti kakti pogubljene tuke
Al smo pri pilu zato ti prvi
Briga nas onda kaj delaju črvi

Nekoje stvari se činiju hudim
Druge pa delaju čistam nas ludim
Veruj budućnost bude i bolja
Tam de pronajde dobra se volja

[riba]

              Nada

Gdje je to nebo što plaće nad nama
Gdje je to sunce kad svugdje je tama
Sivo je nešto stalno u zraku
Gdje naći to malo svjetla u mraku

Pružati ruke,ne znati kome
Vidjeti nekog,ne čuti mu glas
Izgubit se negdje u dubokoj noći
Moliti stranca nekog za spas

Pogledom tražit izlaz tunela
Kako kroz tamu njegovu proć
Nadat se bljesku zore u oku
Pitat dal nada s jutrom će doć

[riba]

            Mesec

Vun se porinul,a ko ga je zval
Bar da bi slova jenoga pital
I ne bu na jenom mestu on stal
Celu se noć po nebu bu skital

Ali se vidi menjka ga malo
Ili zažmernul na jeno je oko
Je morti namegnul,naj bi se znalo
Da se popuni ćim bu visoko

Krila mu nigder videt ni moći
Kak onda more zrakom leteti
Nit ima noge da dejšć mu jih smoći
Al nigder ga v jutro nemreš prijeti

Lepo posveti,da iglu bi našel
Toplinu pa njegvu teško buš vlovil
Dok zmisliš kak bliže njemu bi došel
Mirno po svom bu putu otplovil

[tupka]

nekomu zgleda mjesečina smeta....

[riba]

    Nemre tak dugo

Gdo bu obdelal se puste njive
Od drača ne vidiš međe već krive
Ljudi se slabši,i se ih je menje
Zamenilo trnje zdravo semenje

Suseda vidim je slaba bez gnoja
Ne dugo prešlo,bu takova moja
De koga najti za kositi travu
De koga  najti da drži još kravu

Jeno na drugo,zlo je se veće
Spakirano jelo je v plastične vreće
Snehu već nemreš najti na vrtu
I on je ostavljen za rovanje krtu

V grad si bežiju,ćim dalje od sela
Tam lepo se živi,a malo se dela
Sakom na kraju bu se oprošćeno
A jeno još gruntišće je zapušćeno